Muskurahat ke peeche chhupa dard

Kabhi kabhi life itni ajeeb ho jaati hai na… ki sab kuch hote hue bhi andar ek khaali pan sa mehsoos hota hai. Log kehte hain “tum toh hamesha khush rehte ho,” par unhe kya pata ki wo muskurahat sirf ek aadat ban chuki hai, asli ehsaas nahi. Har din ek nayi kahani hoti hai—andar se thoda aur tootne ki, thoda aur chup rehne ki. Dil karta hai kisi ko sab kuch bata du, par phir lagta hai… samjhega kaun?

Raat ko jab sab so jaate hain, tab khud se baat hoti hai… aur wahi sach saamne aata hai jisse hum din bhar bhaagte rehte hain. Yaadein, expectations, aur kuch adhure sapne—sab ek saath dimaag me ghoomte rehte hain. Kabhi kisi ki kami rulati hai, kabhi khud ki majboori. Aur phir subah uthkar fir se wahi mask pehen lena padta hai—strong hone ka, normal hone ka. Shayad isi ka naam zindagi hai… jahan dard bhi apna lagne lagta hai, aur chup rehna ek skill ban jaata hai. 💔